खाष्ट भाग एक

“अहो काय झालं आणि काय नाही, याला काही अर्थ तरी आहे का? शेवटी काय सासू या नात्याचं नावच बदनाम आहे. मान्य आहे सुरुवातीला सासरी रुळतांना प्रत्येक मुलीला त्रास होतो. पण तरीही सर्वसाधारण वागण्याची काही रीत असते की नाही?” मंदाताईंच्या प्रत्येक शब्दातून त्यांचा राग नीता ताईंना जाणवत होता. फोनवरून आपल्या मुलीची सासू, आपल्याला चार गोष्टी सुनावते आहे हे कितीही क्लेशदायक असलं तरीही नीताताई सायलीला पण पुरेपूर ओळखून होत्या. शिवाय लग्न ठरल्यापासून आत्तापर्यंत वेळोवेळी मंदाताईंनी शक्य तितक्या संयमानं आणि समजूतदारीनं सायलीच्या बालिश आणि पोरकट स्वभावाला, समजूतदारीनं हाताळलं होतं, आणि ही गोष्ट नीताताई पण जाणून होत्या! म्हणूनच यावेळी आपल्या लेकीने काय गुण उधळलेत या केवळ विचाराने नीता ताईंना घाम फुटला होता.