वर्तुळ भाग ३

" यशश्री ताईंना फोन केला त्या अर्धा तासात येतील."
" छान. त्या येईपर्यंत आपण त्यांच्याशी काय बोलायचं, काय विचारायचं ते एकदा ठरवून घेऊ."
" चालेल. एकदा ह्या प्रकरणाची उजळणी करूयात. काय ललित?" प्रीती नेहमीची मजा-मस्करी बाजूला ठेऊन भूमिकेत शिरलेली असते.
मालिनी बोलायला सुरवात करते,"तर ही केस आपल्याकडे ५ दिवसापूर्वी आली. यशश्री ताईंच्या मिस्टरांना म्हणजे विनायक ह्यांना टीबी झाला होता आणि त्यांनी डॉक्टरांच्या प्रिस्क्रिप्शन
नुसार अँटीबायोटिक म्हणजे प्रतिजैविक औषधं घ्यायला सुरवात केली. काही दिवस बरं वाटून नंतर त्यांची तब्येत खालावत गेली. काही महिने उपचार करून पण ते शेवटी न्यूमोनिया होऊन गेले. यशश्री ताईचं असं म्हणणं आहे की त्यांना उपचारच नीट दिले गेले नाहीत.”
“ त्यांनी आपल्याला सगळे रिपोर्ट आणि औषधं दाखवली अगदी प्रिस्क्रिप्शन सुद्धा होती त्यात म्हणजे त्यांचे मिस्टर औषधं नीट घेत असणार हे म्हणू शकतो. म्हणजे त्यांनाही ती शंका नाही कारण त्या स्वतः औषधं देत होत्या." ललित सांगतो.
" बरोबर. आता त्यांचं म्हणणं असं होतं की डॉक्टरांकडून चूक झाली असेल हयात. प्रीती तू डॉक्टरांना फोन करून ह्या संबंधी माहिती घेतलीस का?"
" हो. त्यांनी जे घडलं ते सांगितलं. मी दुसऱ्या काही डॉक्टर ना ही औषधांची नावं पाठवली त्यांनीही सांगितलं की हे उपचार आणि औषधं बरोबर आहेत.त्यामुळे त्यांचा काही दोष नाही."
"ठीक आहे."
इतक्यात यशश्री ताई येतात.
"मी येऊ का आत?"
"हो या ना. तुमचीच वाट बघत होतो आम्ही आणि केस संदर्भात बोलत होतो. या बसा."
यशश्री बसतात.
" काय झालं पुढे? मला वेळ नव्हता चार दिवस. काय करायचं आता पुढे? माझ्या नातेवाईकांनी सांगितलं म्हणून मी इथे झाले होते मला कोर्ट, कंप्लेंट ह्यातलं काही कळत ही नाही आणि माहितीसुद्धा नाही.माझ्या अहोंना खरंच चुकीच्या गोळ्या दिल्या असतील तर मात्र आम्हाला न्याय हवा."
" शांत व्हा. डॉक्टर ना आम्ही विचारुन त्यांच्याबद्दल नीट चौकशी केली. त्यांनी जे उपचार केले ते सगळे बरोबर आहेत. आम्ही दुसऱ्या डॉक्टरांकडून ते तपासून घेतलं आहे."
"मग कोणाची चूकच नाही का? आम्ही सगळं नीट केलं, सगळे उपचार, एक्स- रे, औषधं सगळं नीट केलं. मग चूक कोणाची? का हेच नशिबात होतं माझ्या? म्हणजे ह्या केसला काही अर्थ नाही आता?"
" यशश्री ताई आत्ता तरी तसा ठोस पुरावा किंवा संशय येईल असं काही मिळालं नाही. आम्ही ह्या गोल्यांबद्दल चौकशी करणार आहोत तोच एक मुद्दा राहिला आहे आता नाहीतर ही केस म्हणून ग्राह्य धरली जाणार नाही."
" ठीक आहे मी काय बोलू? म्हणजे आत्ता तुम्ही मला का बोलवून घेतलं?"यशश्री विचारतात.
" तुम्ही एकदा परत आम्हाला सगळं नीट सांगाल का? माफ करा तुमच्यासाठी कठीण आहे हे परत परत सांगणं पण आम्हाला नव्याने काही कळू शकतं."
यशश्री खरं तर अजिबात मनस्थितीत नसतात पण त्या सगळं सविस्तर सांगतात आणि ह्या वेळेला ललित ने ते त्यांचा संमतीने रेकॉर्ड केलं.
"ताई पुढे काय होतंय ते आम्ही तुम्हाला कळवू पण आमच्याकडून तुम्हाला कमीतकमी त्रास होईल ह्याची खबरदारी घेऊ."
यशश्री तिथून निघतात.
" ललित,प्रीती डॉक्टर ची चूक नाही आणि ह्यांची पण नाही. आता आपण गोळ्यांवर लक्ष देऊ. तिथेच गडबड आहे. यशश्री ताई जिथून गोळ्या घेतात तिथे बऱ्याच गोळ्या मेडिकॉम कंपनीमधून वितरित केल्या जातात म्हणून आपण तिथली माहिती मिळवली. हा व्हिडिओ संशयास्पद आहे पण ह्या केस शी काय संबंध येईल त्याचा? असं आपण उगाच संशय म्हणून कोणाला अडकवू नाही शकत. चला आज एवढं बास करूया . घरी जा दोघं मी सुद्धा निघते. उद्या भेटू आणि पुढचं ठरवू."
मालिनी ऑफिस मधून बाहेर पडते आणि तिचा फोन वाजतो. नंबर सेव्ह केलेला नसतो.
" हॅलो. कोण?"
"मालिनी मी विपुल. ओळखलंत ना?”
“हो. बोला.”
“कामात आहात का? म्हणजे मी ऑफिस मधून साधारण निघाला असाल हे समजून फोन केला.”
“कामात नाही आहे पण बोला.”
“आपण भेटूया का? काल बोलणं झालं होतं ना आपलं. उद्या वेळ आहे का? मला उद्याच वेळ आहे. बुधवारी दुकान बंद असतं. तुम्हाला वेळ असेल तरच भेटू नाहीतर नाही.”
“चालेल उद्या काही हरकत नाही फक्त दुपारी चार नंतर. कुठे भेटायचं?”
“ तुम्हीच सांगा. मला वेळ आणि जागा दोन्हीची हरकत नाही.”
“ कॅफे रुमा आहे तिथे भेटू. पत्ता पाठवते.”
“ मला माहिती आहे कुठे आहे कॅफे. मी येईन.”
“ ग्रेट. भेटूया मग.”
मालिनी फोन ठेवते आणि घरी जायला निघते.
. . . . . .. . .. . . . ..... …. ...... ........ …. ...... ....... ..... ....... ........ ........ …. ........ ....... ...... ..... ....