तिचा पैस.. भाग २

आणि सागरिकाचे पाऊल मनोरंजन विश्वात पडले. सुरूवातीला लहान असलेली तिची भूमिका वाढवली गेली. जिथे तिथे तिच्या सौंदर्याची, अभिनयाची आणि नृत्याची चर्चा होऊ लागली होती. यावर शिक्कामोर्तब तेव्हा झाले जेव्हा राज्य पुरस्कार खात्याने तिला सर्वोत्कृष्ट नवोदित चेहरा म्हणून पारितोषिक दिले.
शिक्षण पूर्ण झाले तरी एका महिन्यासाठी म्हणून सुरू झालेली मालिका अजूनही संपली नव्हती. दर वर्षी चॅनेलतर्फे आयोजित केल्या जाणाऱ्या समारंभात तिचे कोणते ना कोणते बक्षिस ठरले असायचेच. पण आता तिचेच मन त्यात रमत नव्हते. तोच ठरलेला सेट, तीच ती कारस्थाने. तिला काहीतरी वेगळे करायचे होते. तशीही इतर ठिकाणांहून कामासाठी सागरिकाला विचारणाही होत होत होती. तिला काही ठोस निर्णय घेता येत नव्हता. शेवटी चॅनेल हेडशी बोलून तिने त्यांची इतर ठिकाणी काम करायची परवानगी घेतली. तिची लोकप्रियता जाणून घेऊन त्यांनीही नाईलाजाने त्या गोष्टीला मान्यता दिली. चालू मालिकेतले काम सोडायचे नाही या बोलीवर.