दि बुमरँग

गोव्याला त्यांचा अलिशान बंगला होता.. पीटर आणि मारिया हे जोडपं तिथेच गेस्टहाऊस मध्ये राहत असत. साफसफाई, बंगल्याची देखरेख करत असत. कधीतरी सत्येन बिझनेस मीटिंगनिम्मित गोव्याला आला की त्याच्या बंगल्यावर जायचा. दोन चार दिवस मुक्काम करून परत घरी मुंबईला निघून यायचा. जेनीही अधूनमधून गोव्याला जात येत असे. पण कधी एकत्र जाणंयेणं होत नव्हतं. नेहमी एकटेच जात असत. त्यामुळे एकत्रपणे एकमेकांच्या सोबत त्यांना कधी वेळ घालवता आला नव्हता. सत्येन सदैव त्याच्या व्यवसायाच्या व्यापांमध्ये आणि जेनी एका नामांकित कंपनीची सी.ई.ओ. होती. त्यामुळे तीही नेहमी बाहेर टुरवर असायची. नवनवीन कंपनीशी भेटी व्हायच्या. कंपनीचा व्यवसाय वृद्धिंगत होण्यासाठी, सेल्स प्रमोशनच्या निमित्ताने ती कायम बाहेर फिरतीवर असायची. मोठमोठया कंपनीच्या डायरेक्टर्स सोबत ती एकटी डील करायची, आतापर्यंत  तिने बऱ्याच मोठमोठ्या कंपन्यांशी टायअप केलं होतं. एकंदरीत काय तर दोघेही कायम आपापल्या कामात व्यस्त.. आपपल्या क्षेत्रात अग्रेसर..