दि बुमरँग भाग ३

“सर, मी आणि माझे पती, सत्येन बजाज मुंबईला राहतो. माझे पती व्यावसायिक आहेत आणि मी एका मल्टिनॅशनल कंपनीची सी.ई.ओ. आहे. काल आमच्या लग्नाचा बारावा वाढदिवस होता. आम्ही तो सेलिब्रेट करण्यासाठी मुंबईहुन इथे गोव्याला आठ दिवसांनी सुट्टी काढून आलो होतो.  गोव्यात आमचा बंगला आहे. गेली चार वर्षांपासून आमचे विश्वासू नोकर पीटर आणि मारिया तिथेच राहतात. बंगल्याची देखभाल करतात. मला अचानक माझ्या ऑफिसच्या एका क्लायंट मीटिंगसाठी अर्जेंटली बेंगलोरला जावं लागलं. म्हणून मग मी सत्येन आणि माझी मुलगी ज्यूली यांना पुढे जायला सांगितलं. परवाच्या दिवशी सत्येनचा मला फोन आला आणि त्याने सांगितलं की तो ज्यूलीला सोबत घेऊन जात नाहीये. ती तिच्या आजी आजोबांच्या सोबत राहणार होती. म्हणून तो एकटाच पुढे गोव्याला निघुन आला होता. आणि त्याने पीटर आणि मारियाला सुट्टी देऊन टाकली होती. ते दोघे आठ दिवसांसाठी त्यांच्या गावी गेले आहेत. आम्ही दोघेच असणार म्हणून तो खुश होता. पण मी काल संध्याकाळी घरी पोहचले तेंव्हा घरात कुलूप होतं. मी सत्येनला फोन केला. त्याचा फोन बंद लागला.  मी दरवाजा उघडून आत गेले. सेलिब्रेशनची तयारी केली. आणि त्याची वाट पाहत बसले पण तो आलाच नाही. कुठे असेल काहीच माहीत नाही”