तेरा मेरा साथ रहे भाग-१३

त्याने तिला उठायला मदत केली. तिच्या पाठीमागे उशी ठेवून तिला बसवलं. तिला फ्रेश व्हायचं होतं आणि वाॅशरूमलाही जायचं होतं. तिची चुळबुळ जणू त्याला कळली. तो तिला फ्रेश व्हायला हाताला धरून घेऊन गेला. तिचं आवरून होईपर्यंत तिथेच दाराजवळच थांबला. ती बाहेर आल्यावर तिला तिच्या बेडवर बसवून तिथल्या उपहारगृहातून चहा नाष्टा घेऊन तिला दिला व फ्रेश होऊन त्यानेही घेतलं. नंतर तिला गोळ्या औषधे दिले. औषधामुळे पुन्हा तिला झोप लागली. ती झोपून गेली. औषधाच्या ग्लानीमुळे ती दोन तास तरी उठणार नाही हे त्याला नर्सकडून समजले होते. नर्सला तो येईपर्यंत तिची काळजी घ्यायला सांगून तो आधी घरी गेला. अंघोळ करून स्वतःचे व स्मिताचे कपडे एका पिशवीत भरले. या दरम्यान तो मालतीशी एका शब्दानेही बोलला नाही. तिनेही स्मिता कशी आहे अशी साधी चौकशी केली नाही. तो दोघांचे कपडे भरत होता तेव्हा ती तिरक्या नजरेने कपाळावर आट्या पाडत बघत होती.