सुशिक्षित सासू -भाग 3 अंतिम

गेले कित्येक दिवस घराकडे लक्ष न दिल्याने पडलेला पसारा तिला समोर दिसत होता. स्वयंपाकघरात अस्ताव्यस्त पसरलेलं सामान तिला जणू चिडवत होतं. बेडरूमची स्थितीही खराब झाली होती. 'आज आई इथे असत्या तर घराची ही अशी अवस्था झाली असती?' अनु स्वतः ला प्रश्न विचारत होती. तिने स्वतःला बेडवर झोकून दिलं. 'आई होत्या तोवर सगळं व्यवस्थित सुरू होतं. त्या जातीने घराकडे लक्ष देत असल्याने मला काही करावं लागलं नाही आणि आता धड घर नाही की ऑफिस नाही.
गावाहून दर महिन्याला सामान येत होतं. सासरे अधून -मधून शेतातल्या भाज्या पाठवत होते अन् सासुबाई आपल्या लेकाच्या प्रेमापोटी इथं राहून प्रेमाने त्याचा संसार सांभाळत होत्या. माझ्यावरही तितकंच प्रेम करत होत्या आणि मी काय केलं? कमी शिकलेल्या म्हणून सतत त्यांचा अपमान करत आले, हिणवलं. पण त्यांनी तोंडून एकही उणा शब्द काढला नाही.'