सुख म्हणजे नक्की काय असतं _ आईचं मन भाग ३ (अंतिम)

विभाला जाणवलं आईच्या आठवणीने मालती ताईंना भरून आलं आहे. आईंच्या वाढदिवसाच्या आदल्या दिवशीच विभा बांगड्या घेऊन आली होती. तिने रजा घ्यायच ठरवलं होतं आणि श्रीकांतला पण तसं सांगितलं होतं कारण आईंचा हा साठवा वाढदिवस होता. त्यावेळी हॉल वगैरे घेऊन असे खास वाढदिवस साजरे केले जात नसले तरी घरातल्या घरात वाढदिवस साजरा होई. सकाळी आईंची पूजा आटोपली तरी विभाची ऑफिसची लगबग दिसत नव्हती. त्यांनी तिला त्याबद्दल विचारताच ती सरळ त्यांना बाहेर हॉलमध्ये घेऊन आली. हॉलमध्ये आधीच शलाका आणि तिचे पती विराजमान झाले होते. तिथे पाट मांडून त्याभोवती सुंदर रांगोळी काढली होती. विभाने त्यांना पाटावर बसवले आणि श्रीकांत आणि आप्पांना सुद्धा बाहेर बोलावले. मालती ताईंना कळेचना हे सर्व काय चाललं आहे.