सौदामिनी 27

अखेर रविवारचा दिवस उजाडला. राजन खूपच आनंदात होता. आजचा दिवस त्याच्यासाठी खूप महत्त्वाचा होता. आता तो चार कधी वाजतील यासाठी घड्याळाकडे नजर लावून होता. वारंवार तो घड्याळाकडे पाहत होता. आजचा दिवस खूप मोठा आहे का? असेही त्याच्या मनात येऊन गेले. तो एक वाजताच घरातून निघाला. उगीच उशीर नको म्हणून तो लवकरच निघाला होता. आता त्याच्याकडे एक त्याची गाडी होती. त्याने स्वतःच्या पगारातून ती घेतली होती. गाडीवरून तो साधारण दीड तासात पोहोचू शकला असता. म्हणजेच घरातून दोन अडीच वाजता निघाला असता तरी चालले असते, पण सौदामिनीने अगदीच बजावले होते की उशीर झाला की निघून जाईल. या भीतीने तो तीन तास आधीच घरातून निघाला.