शिवकाव्य कौस्तुभ -भाग २१

या सर्व विजयाच्या वार्ता, नव्हे शिवबाच्या पराक्रमाच्या वार्ता एका नंतर एक अशा, विजापुरी येऊन धडकत होत्या .त्यामुळे रोजच दरबारात चिंतेचे सावट येऊ लागले होते. दरबारापेक्षा बादशाही महालात या बातम्यांची चिंता जास्त वाढली होती. बादशहापेक्षा त्याची आईच म्हणजे बडी बेगम जास्त बेचैन होती. शिवबाचे प्रताप ऐकून. किल्ले, कोकण किनारपट्टी असे एका नंतर एक हिंदवी स्वराज्यात सामील होत आहेत. हे ऐकून तिचा संताप वाढत होता.
ही बडी बेगम म्हणजे बादशहाची आई. तीच सर्व राज्यकारभार पाहत होती. एक चांगलाच दरारा तिचा विजापूरच्या दरबारात होता. त्यामुळे सर्वजण तिला भीत होते.
शिवबांचे ही उपद्व्याप ऐकून ती फारच चिडली. याला मुळासकट उपटून काढायला पाहिजे. असेच तिने ठरविले.
'एवढेसे ही पोर पण याचे पराक्रम किती थोर' नाही नाही हे थांबलेच पाहिजे. याला लगाम घातलाच पाहिजे. अशी तिच्या मनाची व्यवस्था झाली.
या विचारानेच तिची झोप उडाली होती.
खूप मोठे मोठे आणि पराक्रमी सरदार विजापूरच्या दरबारी चाकरीला होते.
नेमके कोणाला या कामगिरीवर पाठवावे? जेणेकरून शिवा हा जेरबंद होईल?? किंवा त्याच्या या बंडाळ्याला आळा बसेल…??