सावर रे उंच उंच झुला ( भाग ३ )

काही वर्षांनी स्वानंदीच्या मोठ्या दिरांचा मुलगा शिक्षणासाठी परदेशी निघून गेला. तिथे त्याला चांगली नोकरी लागल्यावर त्याच्या आईवडिलांना त्याने तिथे बोलावून घेतले. आता स्वानंदी, तिची लेक आणि तिचे सासुसासरे इतकेच वाड्यात उरले. तिच्या सासऱ्यांना पॅरेलिसिस होऊन त्यांनी अंथरूण पकडले. तसेच सासू देखील वयोपरत्वे थकली असल्याने सासुसासऱ्यांचा भार स्वानंदीवर पडला. स्वानंदी सासुसासऱ्यांचे सारे काही मनापासून करत होती. आता स्वानंदीच्या सासुसासऱ्यांना स्वतःच्याच कृत्याची लाज वाटत होती. सासुसासऱ्यांनी स्वानंदीचा कधीच विचार केला नव्हता. सगळ्यांनी साथ सोडली तरीही स्वानंदी कर्तव्य म्हणून सासरी तग धरून उभी राहिली होती आणि ह्याच गोष्टींची जाणीव तिच्या सासुसासऱ्यांना झाली होती.