सावर रे उंच उंच झुला ( भाग २ )

नयनने समजावून देखील बाबांनी ऐकले नाही. त्यांनी लगेच तिचे लग्न रत्नागिरीमध्ये स्थायिक असलेल्या विश्वास जोशी ह्याच्याशी ठरवले. जोशी कुटुंब हे पुजारी असून तेथील महालक्ष्मी मंदिराचे विश्वस्त होते. गावात कोणाचेही देवाधर्माचे कार्य असले तरी त्यांनाच मान दिला जात असे. रत्नागिरीमध्ये त्यांचा स्वतःचा मोठा वाडा होता. जमीनजुमला होता. एकंदरीत सधन कुटुंब होते जोश्यांचे. जोशींना तीन मुलगे आणि तीन मुली. मुलांमध्ये मोठ्या दोघांची लग्ने झाली होती आणि दोन मुलींची लग्ने झाली होती. विश्वास मुलांमध्ये धाकटा. त्याचे आणि त्याच्या पाठच्या धाकट्या बहिणीचे लग्न व्हायचे होते. मधला भाऊ शिक्षणासाठी मुंबईमध्ये गेला आणि मुंबईमधेच त्याने त्याचे बस्तान बसवले होते.
सणासुदीला कुटुंबाला घेऊन तो गावी येत होता. दोन मुली देखील माहेरपणाला येत असत. स्वानंदीच्या बाबांनी जोश्यांचे भरलेले घर, मोठा वाडा हे सर्व पाहून सोयरीक जुळवली होती.