सावत्र आई भाग ९

पूर्वार्ध: या कथेच्या मागील भागात आपण पाहिलं की, सुमी पाटलांच्या घरी छान रुळली.. मुलांनाही तिचा लळा लागला होता.. ती मुलांची यशोदा झाली होती.. काही दिवसांनी चंद्रभान सुमीसोबत फिरायला घेऊन जातो असं सांगून सुमीला घेऊन मोठ्या शहरात आला.. मोठ्या दवाखान्यात  दाखल करून सुमीवर कुटुंब नियोनाची शस्त्रक्रिया करून घेतली.. सुमीचं मातृत्वाचं सुख कायमचं हिरावून घेतलं होतं आता पुढे..

सावत्र आई.. भाग:- ९

चार दिवसांनी सुमी आणि चंद्रभान आपल्या गावी परत आले.. घरातून निघताना सुमीच्या चेहऱ्यावर जो उत्साह होता तो आता पूर्णपणे मावळला होता.. चेहऱ्यावर ग्लानी दिसू लागली होती.. अगदी ऐन तारुण्यात वार्धक्य आल्यासारखी.. सुमी उदास दिसू लागली.. शांत राहू लागली.. असेच काही दिवस गेले..आणि पुन्हा ती घर कामात लक्ष देऊ लागली पण कामात आता उत्साह नव्हता.

घरातली कामे उरकताना कामात संथपणा जाणवू लागला.. कामे उरकल्यावर ती स्वतःला आपल्याच खोलीत कोंडून घेऊ लागली..सुमीमध्ये अचानक आलेला हा बदल सासूबाईंना जाणवत होता. पण सुमीला काय झालंय? नेमकं हिचं काय बिनसलंय?त्यांना काही उमजेना.. दोन तीन वेळा त्यांनी सुमीला विचारण्याचा प्रयत्न केला पण सुमीने 'काय नाय' म्हणून विषय टाळला होता..