राजम्मा

राजम्मा ©®विवेक चंद्रकांत......खूप पूर्वीची गोष्ट. आम्ही प्राथमिक शाळेत जायचो तेव्हा एक मद्रासी अण्णा गोळयाबीस्कीटचे छोटंसं दुकान लावून बसायचा. मागे त्याचे झोपडीवजा घर. त्याच्या बायकोचे नाव राजम्मा. राजम्मा काळी सावळी. प्रसन्न चेहरा, दुकानात सहसा तीच असायची. हेल काढून हिंदीत बोलायची. आम्ही पोरं गेलो की तिच्या डोळे मायाळू व्हायचे. खूप प्रेमाने बोलायची. माझे गाल तेव्हा एकदम गोबरे होते. माझ्या गालावरून हात फिरवून "बिवेक" म्हणून मला चॉकलेट द्यायची. त्या दोघांना मुलबाळ नव्हते. त्या चॉकलेट च्या मोहापायी मी मित्रांना चुकवून एकटाच तिच्या दुकानात जायचो.

मध्ये काही दिवस अचानक त्याचे दुकान पंधरावीस दिवस बंद राहिले. खरेतर ते सहसा गावी जायचे नाही. शाळेला सुट्टी लागली कीच जायचे. नंतर दुकान उघडले तर आणखी एक काळीकुट्ट तरुणी तिथे दिसली.मग आजूबाजूचे लोक म्हणू लागले की राजम्माला मुलबाळ होतं नाही म्हणून अण्णाने दुसरी बायको करून आणली.