ससा आणि कासवाची आधुनिक गोष्ट (Rabbit And Tortoise Story In Marathi)

"म्हणजे गेले तीन दिवस मी इथे येत होतो. रस्त्यात चालताना माझा वेग आणि मला कुठे पोहोचायला किती वेळ लागतोय हे बघत होतो. जंगलात अर्ध्या रस्त्यात उतार आहे हे मी तेव्हाच बघितलं आणि तिथे वेगाचं नाही तर बुद्धीचं काम आहे हे माझ्या लक्षात आलं. मी घरंगळत तो उतार पार केला. या टेकडीवर येण्याचा सगळ्यात लहान रस्ता ती नदी होती. माझा जमिनीपेक्षा नदीतला वेगही जरा बरा आहे म्हणून तिथून मी तो रस्ता निवडला. तू शर्यत सुरू झाली तेव्हा खूप उत्साहात होतास आणि तूच जिंकणार आहेस हा अती आत्मविश्वास तुला मागे वळून बघण्यास तयार होऊ देत नव्हता. जर तू मागे वळून मला नदीत जाताना किंवा घरंगळत येताना बघितले असतेस तर कदाचित तू अजून जोरात धावून शर्यत जिंकली असती." कासव म्हणाले.