प्रेमाचे सासर भाग १

नुकताच शिशिर संपून वसंताची चाहूल लागली होती. सायंकाळचा मंद गारवा हवाहवासा वाटत होता. सूर्य मावळतीला चालला होता. लाल पिवळसर रंगांची नभी जणू रंगपंचमी सजली होती. पक्षांचा किलबिलाट आसमंती घुमला होता. घरट्याची ओढ त्यांच्या आवाजात प्रकर्षाने जाणवत होती. गोठ्यात असलेल्या गायींच्या तसेच नुकत्याच शेतातून परतलेल्या बैलांच्या घुंगरांचा खुळखुळाट लक्ष वेधून घेत होता. हिरव्यागार चाऱ्यावर सर्व जनावरे तुटून पडली होती. अधूनमधून  मनीचे आणि मोत्याचे पायात घुटमळणे स्वर्ग सुखाचा आनंद देवून जात होते. तो सुंदर नजारा नजरेत साठवण्याचा मोह मग काकांनीही आवरला नाही.

अंगणातील आंब्याच्या झाडाला लागलेल्या मोहोराचा मंद सुवास वाऱ्याच्या झुळूकेबरोबर चहूकडे सुगंध पेरत बेभान होवून जणू पसरत होता. वातावरणात एक प्रकारचा आल्हाददायकपणा आला होता.