प्रीती पर्व दुसरे! भाग -५

राधामावशीचा एक दूरचा भाऊ पुण्यात राहायचा. त्याला फोन करून तिकडे एखादी खोली बघायला तिने सांगितले. त्यानेही एक भाड्याची खोली पाहून दिली. नातेवाईकांनी तसेही तिला अव्हेरलेच होते त्यामुळे त्याने आपल्या घरापासून लांब अंतरावरची खोली शोधली. पुढे कधी तिच्याशी संपर्क नको हा हेतू होताच. मुंबईतील चाळीतील खोली किरायाची होती. आता मुंबई काय नि पुणे काय? भाडे तर दोन्ही ठिकाणी द्यावे लागणार होते. राधामावशीपाशी तिची थोडी जमापुंजी होती. त्यावर काही महिने आरामात निघाले असते पण पुढे काय? हा यक्षप्रश्न होताच. इथे कसेही चार घरी जाऊन ती भांडी घासायची तिथे नव्या शहरात लगेच कोण काम देणार होते?