म्हणून जग फसतं! -19

“ अगं काय करणार.. खरचंच परत यावसंच वाटत नव्हते त्यांचे विलोभनीय नृत्य बघून, पण तेवढ्यात चित्रगुप्त महाराज आपला लॅपटॉप घेऊन आले (हो, आता चित्रगुप्त पण अपग्रेड झालेत नाऽ.. जून्या चोपड्या जाऊन आता तेही ॲडव्हान्स टेक्नॉलॉजीचा वापर करू लागलेत. फक्त इंद्राच्या दरबारातला रंभा,उर्वशचा डान्स मात्र त्याच पारंपरिक पद्धतीने दररोज सुरू असतो म्हणे.) असोऽऽ.,तर मी सांगत काय होतो, हाऽऽ, तर अचानक चित्रगुप्त महाराज आपला लॅपटॉप घेऊन माझ्याकडे आले आणि म्हणाले तुमची रॉंग एंट्री झालीय इकडे. कोणी आणले तुम्हाला इकडे? मी गप्प. मला कसे ठाऊक असणार नाऽ. मग त्यांच्याच लक्षात ही गोष्ट आली, तसा त्यांनी आपला मोर्चा माझ्यावरून यमदूतांकडे वळवला. ‘माझी उचलबांगडी कोणी केली?’ म्हणून जशी चौकशी सुरू झाली त्यात असे निदर्शनास आले की नेहमीचे ड्यूटी यमदूत एक व्हायरल फिव्हर आणि एक सर्दी पडस्याने रजेवर असल्याने दोन न्यू रीक्रूटेड यमदूतांना ही ड्यूटी सोपवली होती. बिचारे अनअनूभवी ना,मग म्हणे नाम साधर्म्यातून मलाच उचलून घेऊन आले.
मग काय चित्रगुप्तांनी जे फायरींग केली म्हणतेस दोघांना, की विचारू नकोस. मला तर त्यावेळी माझा बॅंकेतला खडूस बॉसच आठवला त्यांना बघून. तोही असाच तासून काढायचा थोडी जरी चूक झाली की. आज मी मात्र त्या प्रसंगाची मस्त मजा घेत होतो. ते मान खाली घालून बिचारे ऐकून घेत होते. काय करणार? चूक तर केली होती. आता बोलणे न ऐकून सांगता कुणाला!
अखेरीस त्यांचे मन भरेपर्यंत तासून झाल्यावर लगेच त्यांच्या चूक दुरुस्तीची त्यांना ऑर्डर सोडली गेली.
मग काय रंभेचा डान्स अर्धवट सोडून यावं लागलं परत पृथ्वीवर. यमदुतांनी नुसते डोळे मिटून माझे हात हाती धरले आणि दुसऱ्या क्षणाला मी बेडवर हजर ना वनपीसमध्ये.
हांऽऽ, पण मग मी पण थोडी हुशारी केली. चित्रगुप्त महाराजांना मी म्हणालो, ‘मी इकडे आलोय ते माझ्या नाही, तर तुमच्या गलथान कारभारामुळे. मग आता मला त्याचा काहीतरी इन्सेंटीव्ह मिळायला नको का महाराज?’
त्यावर त्यांची मूद्रा गंभीर झाली. एक मिनिटाकरता मला वाटले ‘बाबो, मी काही जास्त आगाऊपणा तर नाही केला ना,नाहीतर रागात येऊन म्हणतील मग आलाच आहेस तर रहा इकडेच कायमचा.’ पण थॅंकफूली तसे काही झाले नाही. ते मला गंभीर मुद्रेने म्हणाले,