म्हणून जग फसतं! -7

म्हणजे हे सगळे आपल्याच मनाचे खेळ आहेत?
पण मन असे सतत का भरकटतेय?
काय हवेय ह्या मनाला?
मी कुणाची साथ मिस करतेय का?
पण ह्या वयात, आत्ता हा विचार?? किती बरोबर आहे? मी चुकतेय का?
मला नेमके काय हवेय?
शऱ्या बोलत नाही पण खरंच तो त्याच्या बायकोबरोबर खूष असेल का?
आणि जर नसेल तर मग?
तर मगऽऽ….. काय हरकत आहे जर दोन तहानले जीव एकाच इच्छेने एकत्र आले तर!
ती तहान जर मानसिक/भावनिक स्वरूपाची असेल तर अडचण काय आहे??
त्यालाही एका चांगल्या सोबतीची गरज असेल तर काय हरकत आहे आम्ही भेटलो, बोललो तर!
प्रेम कुठल्याही वयात होऊ शकते. मान्य आहे त्याची जोडीदार अजून जीवंत आहे, त्याच्या सोबत आहे पण काय उपयोग अशा जोडीदाराचा जो आपल्या जोडीदाराची पूरक साथ देऊ शकत नाही.
मग अशावेळी सापडली अशी एखादी व्यक्ती जी तुमच्या आवडीनिवडीनुसार त्या त्या विषयात योग्य चर्चात्मक साथसंगत करेल, तुम्हाला ते तुमच्या वयापेक्षा अधिक तरूण बनवेल, तुमच्या मनाची मरगळ झटकून त्याला तारूण्य प्राप्त करून देईल तर मग अशा नात्यात गैर काय आहे!
इट्स हार्मलेस देन व्हाय नॉट?
मी जरा जास्तच टोकाचा विचार करतेय का?
शऱ्या खरंच माझ्यात त्याची उर्वरित अपूर्ण जोडीदार बघत असेल का?
आज मला काहीतरी भारी सरप्राईज मिळणार म्हणालाय. ते सरप्राईज हेच तर नसेल! आज तो कदाचित त्याचे मन माझ्यापूढे उघड तर करणार नसेल नाऽऽ!
बाऽऽऽपरे!! असे झाले तर?
मी काय उत्तर देऊ?
जे मनात आहे तेऽऽ, की जे योग्य आहे ते???