मेघ दाटले - भाग 21

पोलीस स्टेशनला अजिंक्य दिनेशची जबानी ऐकत होता. रात्र हळूहळू गडद होत होती. मधूनच येणारी वाऱ्याची झुळूक अंगावर शहरा आणत होती. रात्रीचे जवळजवळ दोन वाजत आले होते. तोपर्यंत शिंदे दिनेशच्या घरून गाडीचे कागदपत्र घेऊन आले. त्यांच्यासोबत दिनेशचे वडील नितीनराव पोलीस स्टेशनला आले. त्यांनी एकवार दिनेशकडे पाहिलं. रडून रडून त्याचे डोळे लाल झाले होते. तो आपला शून्यात नजर लाऊन बसला होता. नितीनरावांच्या येण्याची चाहूल लागली तशी त्याने नजर त्यांच्याकडे फिरवली. पाणी साठ्लेल्या डोळ्यांनी त्याने बापाकडे पाहिलं. त्याच्या त्या केविलवाण्या नजरेने तो आपल्याला सोडवण्यासाठी बापाकडे हजार आर्जव करत होता. नितींनरावाना देखील त्याची अवस्था पाहवत नव्हती. त्यांनी फक्त डोळे मिटुन त्याला आश्वस्थ केल आणि ते तिथल्याच एका बाकावर जाऊन शांतपणे बसले.