नकळत धागे जुळती भाग - दोन

काही दिवसांनी कळले की, ते दोघं आईबाबा होणार आहेत. आता तर सतीशची जबाबदारी आणखीनच वाढली. सतीश तिला हर प्रकारे तिच्या कामात मदत करत होता. ती मन लावून अभ्यास करत होती. नऊ महिने झाले आणि तिने एका गोंडस मुलीला जन्म दिला.सर्वच खूप आनंदी होते. तिचे नाव विभा ठेवण्यात आले. एक्झामचे वेळापत्रक आले.. विभाला सांभाळून तिला अभ्यास करावा लागत होता. तिला फार कमी वेळ मिळत होता. अभ्यासावेळी सतीश विभाला सांभाळून घेत होता. परिक्षा सुरु झाली. परिक्षा हॉलच्या बाहेर सतीश तीन महिन्याची छोटी विभाला घेऊन हाताचा झोका करून झोपवत होता तर आत मध्ये वसुंधरा पेपर लिहत होती. मध्येच विभा रडत होती. तेव्हा त्याची विभाला शांत करण्याची तारांबळ उडत होती. पेपर लिहून झाला तशी तिने धावत बाहेर येऊन बाळाला घेतले. सगळ्यांनाच तिचं कौतुक वाटत होतं. वसुंधरा छान मार्कांनी पास झाली. तिने पुढे जाऊन ग्रॅज्युएशन पूर्ण करून पास झाली आणि पुन्हा तिला आई होण्याची चाहूल लागली. दूसरी ही तिला मुलगी झाली. बाकीचे नातेवाईक जरा नाराज होते पण त्या दोघांना त्याचा काहीही फरक पडला नाही.