लाईट, कॅमेरा, ऍक्शन (भाग -४७)

'हो सर. माझं कुटुंबं मला साथ देतंय म्हणून हे शक्य झालं. तुम्ही जे बाकी बोलत आहात त्यालाही कित्येक कारणं असतात जी सगळ्यांनाच माहीत असतील असं नाही. तुम्ही म्हणा किंवा कॅरलॉन सर म्हणा तुम्हीही एक बाप आहात. तुमच्या मुलांना सुरक्षा मिळावी, कुठेही काहीही कमी पडू नये म्हणून तुम्ही जी काळजी करत असता तीच काळजी भारतीयांनासुद्धा आहेच ना? सर मान्य आता जग खूप पुढे चाललं आहे पण म्हणून आपण त्या रेसमध्ये धावताना आपल्याच माणसांना जर मागे सोडलं तर याला काय अर्थ आहे? भारतात अजूनही समाजाचा विचार केला जातो कारण आम्हाला त्या सगळ्यांमध्ये मिळून मिसळून राहायचं असतं. जे चूक असेल ते आम्ही दाखवून देतो; नाही असं नाही, पण म्हणून तिथे कोणीही एक घाव दोन तुकडे नाही करत. आपले वडीलधारे जे असतात त्यांनी आपल्यापेक्षा जास्त जग पाहिलेले असते आणि म्हणूनच त्यांच्या मतांचा आणि विचारांचा आम्ही आदर करतो. माझाही प्रवास सोपा नव्हता पण माझ्या नशिबी मला सगळे समजून घेणारे आले. याचा फायदा नक्कीच मी माझ्या देशासाठी करून देईन.' तिने मनातच विचार केला.