सुगरणीचे किस्से भाग १

"आई, मला ना सुजीचा हलवा बनवायचाय. कसा बनवायचा तुला माहीत आहे का? मी युट्यूबवर सर्च केले तर बघून मी बनवू शकते, पण सुजी म्हणजे काय तेच मला समजेना. टिव्हीवर मालिकेत मी बऱ्याचदा पाहिले आहे, नव्या नवरीला सुजीचा हलवा बनवायला सांगतात. मला तर गाजर, दुधी यांचाच हलवा माहीत आहे, आणि माहीमचा हलवा! सांग ना सुजी म्हणजे काय?" मैथिली म्हणाली.
रमाने डोक्यावर हात मारुन घेतला.
" अगं, सुजी म्हणजे रवा."
" रवा? रव्याचा हलवा कसा बनवायचा?" मैथिलीला गहन प्रश्न पडला होता. तिने गाजर, दुधी खिसताना आईला पाहिले होते. रवा कसा खिसायचा? हा तो गहन प्रश्न होता.
" अगं, आपण शिरा बनवतो ना, त्याला ते सुजी का हलवा म्हणतात. तू ड्रायफ्रूटस् घालून तुपातला शिरा बनव."
"बरं . ठेव आता. मी जाते किचनमध्ये."
" अगं, गरज पडली तर सासुबाईंना विचार..." हे रमाचे शब्द तिच्यापर्यंत पोहोचलेच नाहीत कारण तिने त्याआधीच फोन कट केला होता. आता ही काय उजेड पाडते याची रमाला काळजी लागून राहिली.