झाकली मूठ - प्रेमाची (भाग - ३)

तेवढ्यात, मीरा आणि चिंगी आल्या. मीरा आणि वैशाली ताई बोलत बसल्या, तर रेवा आजूबाजूला बघणाऱ्या त्या चिंगीच निरीक्षण करू लागली.
 
'विराजने सांगितल्याप्रमाणे तर चिंगीच्या वागण्यावरून तिच्या बालमनावर परिणाम झालाय असं अजिबात वाटतं नाहीय. उलट खूप समंजस वाटतेय.' रेवा तिच्याकडे बघतच मनात विचार करू लागली
 
तेवढ्यात, कसल्याश्या आवाजाने ती भानावर आली. चिंगी पुन्हा हायपर झालेली होती. देवळातले सगळे तिच्याकडे बघत होते. मीरा वहिनी तिला धरून घेऊन जाऊ लागल्या. चिंगी सारखी एका दिशेला बघून ओरडत होती. तशी रेवा सुद्धा त्या दिशेला बघू लागली. 
 
एका बाईच्या ओटीत मोगऱ्याचा गजरा होता. तो पाहूनच ती इतकी वॉयलंट झालेली होती.  
 
'असं काय आहे त्या गजऱ्यात ज्याने ही इतकी वॉयलंट होते? ह्या गजऱ्याचा संबंध हिच्या बालपणातील गोष्टींशी असेल का? पण हे मला कस कळेल?' विचार करत असतानाच रेवाच्या कानांत घंटेचा नाद घुमला आणि तिच्या मनात एक नाव आलं. तिने एक नजर देवीच्या मूर्तीकडे बघितले आणि मनोभावे हात जोडले.