झाकली मूठ - प्रेमाची (भाग - १०) अंतिम

"आई, मला माहितीये. काल झालेल्या प्रकारानंतर तुम्हाला माझा खूप राग आलाय. जो येणं अगदीच साहजिक आहे, पण आई चिंगीलासुद्धा तिच्या हक्काचं घर आणि माणसे मिळावीत. असं तुम्हाला नाही वाटतं का? चिंगी ह्या घराण्याची कायदेशीर वारस आहे म्हटल्यावर ती ह्या घरावर आणि संपत्तीवर हक्क सांगू शकली असती, पण तिने तसं केलं नाही कारण तिला ही संपत्ती नकोय. तिला आपल्या माणसांच प्रेम आणि सहवास हवाय जो तिने कधीच अनुभवला नाही. आई तुमचा चिंगीवर राग नाहीय, हेही मला माहितीये पण ती तुमच्या नवऱ्याच्या प्रेयसीची मुलगी आहे ही गोष्ट तुमच्या मनाला जास्त खातेय ना." रेवा असं म्हणताच वैशालीताई तिच्याकडे आश्चर्याने बघू लागल्या.