होते कुरूप वेडे भाग-3 अंतिम

लग्नाची तारीख ठरली लग्न अगदी साधेपणाने करायचे होते. आवश्यक ती खरेदी झाली.
पण....
'दैव देते आणि कर्म नेते' अशी म्हण आहे आपल्याकडे.
स्वतःच्या लग्नाच्या पत्रिका वाटण्यासाठी म्हणून तो गाडीवर बाहेर गेला आणि त्याला एका फोर व्हीलर ने ठोकले डोक्याला जबर मार लागला. सगळे उपाय
नाकाम ठरले. शेवटी तो हे जग सोडून गेला.
उज्वला पुन्हा एकाकी झाली.
आता तर लोकांनी शिक्कामोर्तबच केले की ही मुलगी फक्त कुरुपच नाही तर अवलक्षणी आहे.
आई वडील काळजीने खंगून गेले होते. उज्वला त्यांचा आधार बनली. उज्वलाने लग्नाचा विचार डोक्यातून अगदी दूर केला होता. आणि तिने आई-बाबांनाही समजावले होते.
पण काही जणांच्या जीवनात भाग्ययोग उशिरा असतात.

तिचा सदतीसावा वाढदिवस. शाळेतील मुलींनी साजरा केला. ती विद्यार्थिनींची खूप लाडकी होती.
शाळेच्या मुख्याध्यापकांना खूप कौतुक वाटले.उज्वला त्यांना खूप आवडायची ते तिच्या आंतरिक गुणांवर फिदा होते.
ती खूप सालस आणि कामसू होती. मुख्यमंत्री सुंदर शाळा योजनेमध्ये त्यांच्या शाळेला उज्वलाच्या उत्तम कामगिरीमुळेच खरे तर प्रथम क्रमांक मिळाला होता. शालेय शिक्षणाबरोबरच तिने विद्यार्थीनीना खेळ व क्रीडा, वक्तृत्व, वादविवाद गायन या सर्वच क्षेत्रात त्यांच्यातील गुण ओळखून प्रोत्साहन देत घडविले होते.