हिच गाडी घेणार अंतिम भाग

पुढच्या काही दिवसातच त्याचा शोध संपला आणि घरात नवीन गाडी घेणार असल्याचे जाहीर केले. तस घरात परत आनंदाच उधाण आलं. पुढच्या रविवारी ते नवीन गाडी बघायला शोरूमला जात असल्याच त्याने घरात सांगितलं. तशी त्याची बायको आणि बहिण कोणती गाडी घेत असल्याचे त्याला सारखे विचारू लागले. पण त्याने ते सांगायचं टाळल होत. मग पुढच्या रविवारची ते उत्सुकतेने वाट बघू लागले.

बघता बघता रविवार उजाडला. त्याने जुनी गाडी आधीच त्या शोरूमला देऊन टाकली असल्याने आज ते टॅक्सी करून शोरूमला पोहोचले.

“आपण ही गाडी बघायला आलोय?” आई त्याच्याकडे आठ्या पाडून बघू लागली.

“दादा, सिरीयसली?” त्याची बहिण देखील त्याच्याकडे विचित्र नजरेने बघत विचारू लागली.

“तुम्हीच बसायच त्या गाडीत.” त्याची बायको रागात त्याला धमकी देत बोलली.

“आता तुम्हालाच गाडीत एसी लागत नाही.” स्वरांश त्याचे खांदे उडवत बोलला. “मला लागतो. मग म्हटलं तूम्ही मागच्या डालेत बसायच आणि मलाही पूढे एसी मिळेल.”

तश्या त्या तिघी त्याच्याकडे रोखून बघायला लागल्या.

“तूम्हीच तर बोलले ना की तुझ्यापर्यंत एसी बघ.” तोही चिडून बोलला.

“म्हणून हा पिक अप?” त्याची बायको कपाळावर भल्या मोठ्या आठ्या पाडून विचारू लागली.

शोरूमला पोहोचल्यावर त्याने त्या तिघींना त्या कंपनीने नवीनच लाँच केलेला एसी पिकअप दाखवला होता, जो डिलीव्हरीसाठी तयार होता. स्वरांशने त्या तिघींना त्या समोरच नेऊन तिचं गाडी घेत असल्याच त्यांना सांगितलं होत.

“हा,” स्वरांश आज हसत बोलत होता. “म्हणजे तुम्हाला सीटची सफाई करावी लागणार नाही. पाहिजे तेवढी हवा. पाय आखडून येणार नाही. हव तेव्हा बसा, हव तेव्हा झोपा. जागाच जागा. वरून तुम्हाला हव तेवढं सामान पण आणता येईल.”

आता मात्र त्या तिघी त्याच्याकडे रागात बघायला लागल्या.

तसा स्वरांशचा तो मित्र ह्या तिघींजवळ आला. “अहो मावशी गम्मत करत आहेत ते, तुमची गाडी तर आतमध्ये आहे.”

तश्या त्या तिघी अजून गोंधळून बघू लागल्या. मग स्वरांश त्यांच्याजवळ गेला. “तुम्हाला खरचं वाटल की तुम्हाला मी ह्या पिकअपच्या मागच्या डाल्यात बसवेल?”

मग तो त्यांना त्यांच्या खऱ्या गाडीकडे घेऊन गेला. ती गाडी अजूनही लाल कपड्यात झाकलेली होती. आईच्या हाताने ते लाल कापड काढल गेल. तर तिथे सेवेन सीटर लक्झरी गाडी उभी असलेली दिसली.

‘एक दिवस आपल्याकडे पण एकदम महागडी गाडी असेल.’ ती गाडी बघून आपल्या नवऱ्याच वाक्य त्याच्या आईला आठवलं आणि तिचे डोळे लागलीच भरून आले.

गाडीची डिलीव्हरी घेतली आणि गाडी शोरूमच्या बाहेर आणली.

“ज्यांना एसी आवडत नाही त्यांनी गाडीच्या टपावर बसायचं.” स्वरांश तोऱ्यात बोलला. तश्या त्या तिघी बारीक डोळे करून त्याला बघायला लागल्या.

मग तिथल्या मॅनेजरने एसी वापरण्याचे फायदे आणि तोटे त्यांना समजावून सांगितले. “अश्या गाड्यामधले इलेक्ट्रोनिक्स धूळ गेल्याने खराब होतात. त्यामुळे जास्तीचा खर्च वाढला जाईल. म्हणून शक्यतो गाडीच्या काचा उघडून गाडी चालवू नका.”