हाराकिरी भाग २

तपासादरम्यान मेघनाच्या आयुष्याशी संबंधित अनेक पात्रे समोर आली. तिच्या कुटुंबियांनी सांगितले की, त्यांच्या कुटुंबाचे कुणाशीही वैर नव्हते. कुणी त्यांच्या वाईटावर असण्याची शक्यता नाही असेही सांगितले. मेघना एक धीट मुलगी होती. ती आत्महत्या करेल असे वाटत नाही असेही त्यांनी सांगितले.
तिच्या सहकाऱ्यांमध्ये ती खूप लोकप्रिय होती, पण एका व्यक्तीबद्दल वेगवेगळ्या प्रतिक्रिया होत्या—रोहित वर्मा.
रोहित तिचा ऑफिसमधील सहकारी होता. त्याला चौकशीसाठी बोलावण्यात आले.
“तुम्ही मेघनाशी शेवटचे कधी बोललात?” राघवने थेट विचारले.
“काल रात्री १०:३० वाजता. ती खूप घाबरलेली वाटत होती. म्हणाली, मला काहीतरी महत्त्वाचे सांगायचे आहे. पण काय ते सांगायच्या आधीच फोन कट झाला,” रोहित म्हणाला.
“तुम्ही तिच्या फ्लॅटवर गेला होतात का त्या रात्री?”
“नाही, मी घरी होतो. मी तिचा मित्र होतो, पण मी तिला भेटायला गेलो नव्हतो.”