हि पंक्ती गुरूंना अगदी योग्य शब्दात वर्णविते.आयुष्यात योग्य मार्गावर चालायला आणि जीवनात विविध गोष्टीचे ज्ञान संपादन करायला गुरु हे हवेच.
जन्माला आल्यापासून ते अगदी शेवटच्या क्षणापर्यंत आपल्याला बरीच माणसं भेटत असतात.वयाने लहान असो की मोठी,प्रत्येक व्यक्तीकडून एक तरी गोष्ट शिकण्यासारखी नक्की असते असे मला वाटते.
माझी आई नेहमी म्हणते की संकटे आली तर घाबरून जायचं नाही उलट स्वतःला अजून खंबीर बनवायचं आणि न थांबता पुढे चालत राहायचं.कष्ट करणाऱ्या माणसाला यश हे मिळतंचं फक्त धीर सोडायचा नाही.आईची हि शिकवण मला प्रत्येक कठीण प्रसंगी बळ देत असते.
माझ्या आईने मला हेही शिकवलं की, आपली चूक असेल तर ती कबुल करून त्यात सुधारणा करायची.सॉरी म्हंटल्याने कुणी लहान होत नसतो.पण जिथे आपली चूक नसेल तिथे नेहमीच ऐकून नाही घ्यायचं नाहीतर लोक आपल्याला गृहीत धरतात.
आई-वडिलांनी नेहमीच मला आम्ही तुझ्या पाठीशी आहोत तू घाबरू नकोस हा विश्वास दिला त्यामुळे मी जीवनात यशस्वी वाटचाल करू शकले.ते पाठीशी उभे आहेत ह्या विचारानेच मला नेहमी खूप हिम्मत मिळते.
शाळा कॉलेजमध्ये खूप चांगले शिक्षक लाभले ज्यांनी आमच्यावर चांगले संस्कार आणि पुस्तकाच्या पलीकडे जाऊन जे प्रॅक्टिकल ज्ञान हवे तेही दिले.आजकाल गुगल गुरुमुळे सगळं जग जवळ आलं आहे.जे हवं त्या सगळ्या गोष्टींचे ज्ञान आपल्याला गुगल सर्चवर एका क्लिकमुळे सहज मिळते.हे कितीही खरं असलं तरी शेवटी योग्य मार्ग दाखवायला गुरु हे हवेच असतात.जे वेळीच चुकल्यावर कान पकडतात आणि चांगल्या कामाला शबासकी देतात.असे गुरु मला लाभले हे मी माझे भाग्यच समजते.
आयुष्यात भेटलेले मित्र-मैत्रीणी ह्यांनी मला एकीमध्ये बळ असतं हे शिकवलं.एकमेकांच्या साथीने आपण यशाची शिखरे चांगल्याप्रकारे पादाक्रांत करू शकतो हे मी त्यांच्यामुळे शिकले.
लग्नानंतर नवरोबाकडून कोणतेही काम करायचे तर त्यात परफेक्शन असावे हे शिकले.आपलं आपण शंभर टक्के दिलं की काम छान होतं आणि आपल्याला मानसिक समाधान मिळते हे त्याच्याकडून अगदी शिकण्यासारखे आहे.माझं छोटंसं बाळ अद्वैत,त्याच्याकडून मी आई म्हणून दिवसागणिक घडत आहे.त्याच्यामुळे मी माझी पेशन्स लेव्हल वाढवायला शिकले,जी आपल्याला जीवनात खूप वेळा गरजेची असते.
मी इंजिनियरींग कॉलेजला प्रोफेसर म्हणून कार्यरत आहे.तिथे भेटत असणारे वेगवेगळ्या प्रकारचे विद्यार्थी मला बरंच काही शिकवून जातात.आपण अजून कसं आणि काय शिकवावं ज्यामुळे हे भावी इंजिनियर चांगले माणूस म्हणून घडतील ह्याकडे माझं लक्ष असते.बरीच मुलं नवनवीन टेक्निकल कल्पना सुचवतात तर काही त्यांच्या अफाट विचारशक्तीतून मला चाट पाडतात.
शेवटी इतकंच म्हणेल की...माझ्या सर्व गुरूंना माझे नमन करते.
तुमचा आशीर्वाद सदैव पाठीशी राहुदेत हेच देवाकडे मागणे मागते.
गुरुर देवो महेश्वरः
गुरुर साक्षात परम ब्रह्म
तस्मै श्री गुरुवे नमः||
©®सुप्रिया शिंदे महादेवकर.