गुंतवणूक नात्यांमधली भाग २

कोकणात उन्हाळ्याच्या सुट्टीत तर आंबे खाण्याची चंगळच असायची.  तिथे दिवसभर वाड्यात खेळायला सवंगडी पण भरपूर होते.  संध्याकाळी त्याची आई आणि इतर मुलांच्या आया त्यांना सुद्रावर फिरायला घेऊन जायच्या. जाताना कधी घरून खाऊ घेऊन जायचे तर कधी समुद्रावरील भेळेचा आस्वाद घेतला जायचा.  घरी आल्यावर हातपाय धुवून शुभम करोति, परवचा म्हणून झाल्यावर आजीच्या हातच्या मऊसूत तांदळाच्या भाकऱ्या, लोणी ह्यांचा समाचार घेतला जायचा.  आजी श्रीधरला खूप प्रेमाने भरवायची.  त्यावेळी आजी आजोबांचे प्रेम एखाद्या दुथडी भरून वाहणाऱ्या नदीच्या पात्राप्रमाणे असायचं.  श्रीधरला अगदी लहान असताना गावच्या मातीत खेळणे, कोंबड्यांच्या मागे लागणं सगळंच खूप आवडायचं. आजीच्या कुशीत तिच्या प्रेमाच्या मायेच्या गोधडीत त्याला खूप आश्वासक झोप लागायची.  आजोबा त्याला नवीन खेळ शिकवायचे. त्याच्यासाठी आमरस करणं म्हणजे आजोबांसाठी खूपच आवडीचं काम होतं.