कथा -नात्यातील गोडवा गोकुळ भाग 2

त्यांना आपले कुटुंब आठवले .आपल्या कुटुंबात आपण किती सुरक्षित होतो,आणि आता हे होत्याचे नव्हते झाले. त्या बेटावर ते अडकून पडले. भुकेने व्याकुळ झाल्यामुळे, काही मिळते का, हे ते शोधू लागले. त्यांनी तेथील बांबूच्या साह्याने नारळ काढून, त्या नारळातील पाण्याने आपली भूक आणि तहान भागवली.त्या अणकुचिदार खडकांनी पावले सोलवटून रक्तबंबाळ होतील, या भीतीने ते तो वाळूचा किनारा सोडून कुठेच गेले नाहीत. निळ्या आकाशाखाली झोप व रात्री चांदण्या मोजणे, एवढेच त्यांच्या हाती होतं. जागे असताना ते, समुद्रात कोणते जहाज दिसते का, किंवा आकाशात विमान दिसते का, हे ते शोधायचे. हेतू हाच की, इशारा करून कोणीतरी नजरेस पडावे. व तेथून त्यांची सुटका व्हावी. त्यांना त्यांच्या मित्राची खूप आठवण येत होती. परंतु ते काहीच करू शकत नव्हते. नुसतं या ठिकाणाहून कशी सुटका होईल, याची वाट पहात, आला दिवस ढकलणे, हेच काय ते त्यांच्या हातात उरले होते.
असे काही दिवस त्यांना त्याच अवस्थेत राहावे लागले.