कशासाठी ? प्रेमासाठी ! ( भाग 1 )

घरात एवढी लग्नाची तयारी होत होती. पण जुई एका शब्दानेही काही बोलली नाही. माझे हर्षल वर प्रेम आहे, मी हे लग्न नाही करणार असे काही. सर्व काही बघत होती. हो ला हो मिळवत राहिली. मला वाटले, या लग्नाला ती मनापासून तयार आहे . ती काही तिच्या प्रेमाबद्दल बोलली असती तर काही तरी मार्ग शोधला असता ना! मी ही किती वेडी ना.. मलाही तिच्या मनाचा ठाव घेता आला नाही. मुलगा चांगला, माणसे चांगली आणि घरबसल्या स्थळ आले म्हणून मी ही तिच्या सुखाचा विचार करता तिच्या लग्नाचा विचार केला. तिला ते लग्नानंतर पुढचे शिक्षण करू देणार होते. सर्व काही तर चांगले होते. पण जुईच्या मनात हर्षल होता हे आपल्याला कधी कळलेच नाही.लग्न जवळ आले आणि ही गेली हर्षल सोबत.