एक झाड पैश्याचे

"अरे, तुला काय कमी आहे?"
हे वाक्य ऐकून आता माणसाला हसू की रडू हेच कळेनासे झालेय! तुम्ही लाखात कमवायला लागला की काही लोकांना वाटते की आता तुमच्याकडे पैशांचे झाडच उगवलेय. रोज सकाळी उठून एक हलकासा झटका दिला की हजार-दोन हजार गळून पडतील आणि दिवसभर उधळायला मिळेल!
"उधार घेतले? परत करायचा आहे का?"
हा प्रश्न काही लोकांसाठी अगदी हास्यास्पद आहे. कारण त्यांच्यासाठी उधारी म्हणजे दान आणि तुम्ही म्हणजे चालतं-बोलतं चॅरिटी फंड! ते तुमच्याकडून पैसे घेतील, मजेत फिरतील, घरात आलिशान वस्तू आणतील, पण पैसे परत द्यायचे नावही काढणार नाहीत. आणि वरून तुम्ही विचारले की,
"अरे हो हो, देतो की! आता काय एवढं?"
असं बोलून त्याच क्षणी विसरूनही जातील.
पण तुम्ही मात्र… रात्रभर विचार करत पडून राहणार.