भेटली ती पुन्हा (भाग १०)

आजूबाजूला बघताना त्याचं लक्ष समोर बसलेल्या मंजिरीच्या मागच्या टेबलवर गेलं... तिथे एक मुलगी आणि समोर चक्क मेघना बसली होती. संजयने मेघनाकडे बघायला आणि तिनेही समोरून संजयला बघायला अशी एकच नजरानजर झाली आणि संजयच्या डोळ्यात एक वेगळीच चमक आली. आज मेघनाला त्या गुलाबी साडीत, सागर वेणी घालून त्यावर गजरा माळलेला बघून तिचं ते मोहक रूप पुन्हा पुन्हा नजरेत साठवून घ्यावं वाटलं त्याला. त्याची नजर तिच्यावरच खिळून राहिली. संजय आपल्याकडेच बघतोय हे पाहून मेघना जरा बावरली. तिने खाली मान घालून खायला सुरुवात केली. तिच्या समोर बसलेल्या वानिताची अखंड बडबड चालूच होती पण आता मात्र मेघना त्यातलं काहीही ऐकत नव्हती... तिला ऐकू येतच नव्हतं.. कारण समोर असं अचानक संजयला बघून तिच्या मनात सप्तसूर निनादू लागले होते. ती संजयची नजर टाळायला नजर खाली करूनच खात राहिली.