भेटली तू पुन्हा ! भाग - एकोणतीस

“माझाच मुलगा माझ्यासमोर अनोळखी म्हणून आला. खूपच गोड आहे तो. मला अंकल म्हणतो त्याला माहितच नाही की मी त्याचा बाबा आहे.. मला ही आजच कळलं की तो माझं बाळ आहे माझं. मी किती दुर्देवी आहे काका मी त्याच्या जगात येण्याच्या आणि नंतरच्या कोणत्याही क्षणात त्याच्या जवळ नव्हतो. माझ्या बाळाचा जन्म, त्याला आपल्या या हातात घेणं, त्याचे बोबडे बोल, त्याच्या सोबत खेळणं, त्याची बाबा म्हणून मारलेली हाक या सर्व सर्व आठवणी गमावून बसलो काका!” तो हताश होऊन जड आवाजात बोलत होता. मन अगदी भरून आलं होतं .. हे सत्य तो नाकारत नव्हता पण पाच वर्ष या सत्यापासून अनभिज्ञ होता. या गोष्टीचा विश्वराजला त्रास होत होता.. त्याला त्रासात बघून काकांच्या ही डोळ्यात पाणी तरळले.