बेडी प्रेमाची की विश्वासाची?

अवनी.. कॉलेजमध्ये शिकणारी मुलगी. अतिशय हुशार आणि सुंदरही. मैत्रिणींनी आग्रह केला म्हणून कॉलेजच्या कार्यक्रमात भाग घेतला. तिथेच तिची ओळख सार्थकशी झाली. तो कॉलेजचा माजी विद्यार्थी. जुन्या ओळखीवर तिथे आला होता. सतत गाड्या उडवत असायचा. नवीन कपडे घालून कॉलेजमध्ये फिरत असायचा. त्यासाठी कुठून पैसे आणायचा हे कोडेच होते. साधी भोळी अवनी त्याच्या रफटफ लुकवर भाळली. त्याने ही तिच्याभोवती आपले जाळे टाकले. अवनी त्याच्या प्रेमात वेडी झाली. दोघे कॉलेजमध्ये भेटायचे. हळूहळू सार्थकच्या तिच्याकडून अपेक्षा वाढू लागल्या. मध्यमवर्गीय संस्कार असलेली अवनी मात्र अजून अशा गोष्टींना तयार नव्हती. त्यामुळे त्याची चिडचिड व्हायला लागली होती. अवनी मात्र तो हातातून जाऊ नये यासाठी धडपडत होती. त्याचवेळेस घरी काही समजू नये यासाठीही तिची धडपड सुरू होती. आता सार्थक घरी येणार म्हणजे तिला थोडं टेन्शन आलं होतं. आईबाबांना ही गोष्ट मान्य होणार नाही हे तिला माहीत होतं तरिही तारुण्यसुलभ भावना तिला खुणावत होत्या.