बाप्पा सांग ना रे...!

आता आबासुद्धा माझ्याबरोबर खेळत नाहीत. आधी बाबा आणि ते मिळून किती खेळायचे माझ्याबरोबर! आम्ही रोज फिरायला जायचो. रोज काहीतरी नवीन खायचो. किती मज्जा यायची. पण आता माझ्याबरोबर जास्त बोलतच नाहीत. शांत शांत असतात. त्या दिवशी आबांचे मित्र आले होते त्यांना बोलवायला. त्यांच्यापैकी प्रभाकर आजोबा माझे खुप लाड करतात. ते आबांना म्हणत होते, की \"आता सावर यातून.. चार महिने झाले दिनेशला जाऊन. सुनबाई आणि बायकोला सांभाळ. स्नेहल अजून लहान आहे, तिला काही माहीत नाही. तिला नीट समजावून सांग. झाले गेले विसरून जा.\" मी त्यांना विचारलं, की \"बाबा तर फक्त फिरायला गेले आहेत ना? मग त्यांना विसरून जायची काय गरज आहे?\" तर माझ्या डोक्यावरून हात फिरवून मला म्हणाले, \"तुला नाही कळणार! तू अजून लहान आहेस!\" सगळे असच म्हणतात. बाप्पा, सांग ना रे, बाबांना कधी पाठवतोयस परत? ते आले ना, की ते मला नक्की समजावून सांगतील. ते अस नाही म्हणणार मला, की तू लहान आहेस म्हणून..!