बाबा, मला माफ करा भाग 2

प्रकाशराव मेहनती होते,हुशार होते. त्यामुळे त्यांची व्यवसायात चांगली प्रगती होत होती.लक्ष्मी त्यांच्यावर प्रसन्न होती. पण प्रकाशराव असे शांतपणे सुखाचा उपभोग घेणार्‍यांपैकी नव्हते. त्यांचा पिंडच वेगळा होता. लोकांना मदत करणे, त्यांना मनापासून आवडत होते. मदत लहान असो की मोठी, ते आपल्या परीने प्रयत्न करायचे. त्यांच्या नि:स्वार्थी भावनेमुळे त्यांना त्यांच्या कार्यात यशही मिळत होते. आजारपण,शिक्षण, लग्नकार्य , व्यवसाय किंवा अजून कोणतेही कारण असो, ते पैशांची व इतर काही मदत लागली तर करत होते.त्यांचे नशीबही खूप चांगले होते. लोकांनीही त्यांच्या स्वभावाचा गैरफायदा कधी घेतला नाही.त्यांचे पैसे लोक आठवणीने परत करत. काही खरंच खूप गरीब असतील तर प्रकाशराव त्यांच्याकडून पैसे परत घेत नव्हते.