अजूनही बरसात आहे.. भाग ४

स्वरा तिथून अभिषेकचा निरोप घेऊन आपल्या मैत्रिणींना जॉईन करण्यासाठी कॅन्टीनच्या दिशेने निघाली. खरंतर स्वरा मनातून सुखावली होती. तिला तर आधीपासूनच अर्णव आवडत होता. त्याचं तिच्याकडे पाहणं, काळजी करणं तिला आवडत होतं. त्याचं अदबीने वागणं, बोलणं तिला त्याच्याकडे आकर्षित करू लागलं होतं. मुलींविषयी त्याच्या मनात असलेला आदर त्याच्या वागण्यात, बोलण्यात कायम तिला जाणवायचा. त्याच्या कविता ऐकताना, वाचताना ती त्यात रमून जायची. त्याचं गिटार वाजवणं तिला अजून त्याच्याजवळ खेचून नेत होतं. त्याचं गाणं ऐकताना ती देहभान विसरून जायची. जणू काही गाण्यातल्या प्रत्येक बोलातून, शब्दातून तो तिला भेटायचा. तिला त्याची ओढ वाटू लागली होती. प्रेम वाटू लागलं होतं पण मनातलं ओठांवर आलं नव्हतं. स्वराची ही अवस्था स्नेहलला कळून चुकली होती. एक दिवस स्वरा आणि स्नेहल कॉलेजच्या आवारात बाकावर बसून गप्पा मारत होत्या. बोलण्यात अर्णवचाच विषय होता.