अगर तुम साथ हो.. भाग १४

"राग नको येऊन देऊस.. पण तुम्ही काय प्लॅनिंग करताय का?" सहज विचारते आहे असं दाखवत पल्लवी विचारत होती.

पल्लवीने स्मिताताईंकडे टाकलेला कटाक्ष काव्याला समजला. ती कोणत्या अर्थाने विचारते आहे, ते ही तिला समजले. एक क्षणभर तिला वाटले की त्यांना सांगावे, मीसुद्धा गरोदर आहे. पण तिला स्वतःलाच ही गोष्ट एवढ्यात सांगायची नव्हती. तसेही तिथे परत येऊन त्या दोघांना आठच दिवस झाले होते. घरातल्यांचे स्वभाव परत नव्याने समजत होते. हे दोघे आले आहेत हे समजताच पल्लवीचे धुमधडाक्यात डोहाळजेवण करायचे ठरले. सातव्या महिन्यात एकदा केले होते. तेव्हा तोंडदेखलंही कोणी ये, असं म्हटलं नव्हतं. पण आता भाऊ असताना परत केले जात होते. नाही म्हटलं तरी काव्याला ही गोष्ट खटकत होती. रितेशला हे सगळं हवं आहे म्हटल्यावर तिने मूक प्रेक्षकाची भूमिका घेतली होती.