अगर तुम साथ हो.. भाग ७

"पोहोचतो.." एवढंच बोलून रितेशने फोन ठेवला. काव्याने इथे सुस्कारा सोडला. त्यांचं लग्न होऊन महिना झाला तरी रितेशच्या नोकरीचं काही होत नव्हतं. घरी त्याच्या आईबाबांचे वागणे 'बरे..' या प्रकारात मोडणारे होते. कोणत्या गोष्टींवर कोणाची काय प्रतिक्रिया येईल हे तिला अजूनही समजत नव्हते. त्यात हळूहळू स्मिताताई येताजाता तिला बोलू लागल्या होत्या. रितेशच्या नोकरीचा तिच्याशी काय संबंध होता, हेच तिला कळत नव्हते. आज तिचा पगार झाला होता. घरखर्चासाठी पैसे घरी द्यायची तिची इच्छा होती. पण ही गोष्ट घरी कशी मांडायची ते ठरवण्यासाठी तिला रितेशला बाहेर भेटायचे होते. ऑफिस संपताच चेहर्‍यावर पावडरचा थोडा हलका हात फिरवत ती निघाली. नेहमीच्या जागेवर येताच तिच्या चेहर्‍यावर हास्य पसरले. रितेश तिची वाटच बघत होता.